په ملي دفاع وزارت کې د مارچ اتمه د ښځو نړیواله ورځ د ځانګړو مراسمو په ترڅ کې ولمانځل شوه
د ښځو نړیواله ورځ د شانداره مراسمو په ترڅ کې د ملي دفاع وزارت کې د هېواد د لومړۍ مېرمنې رولا "غني"، د ملي دفاع وزارت لومړي مرستیال او سرپرست شاه محمود «میاخیل»، د کورنیو چارو وزیر محمد مسعود "اندرابي" د نړیوالو همکارانو او د ملي دفاع وزارت د جنرالانو او افسرانو په ګډون ترسره شوه.
په دې مراسمو کې د هېواد لومړۍ میرمنې وویل، په بیلابیلو برخو کې د ښځو کړنې او لاسته راوړنې مهم او ارزښتناکه وګڼل کیږي، او زیاته يې کړه:« په پریکړو کې د ښځو اندونه او نظریات مهم دي، په دې توګه دوی کولی شي په ټولنه کې یو موثره نمونه دي».
همداراز د ملي دفاع وزارت لومړي مرستیال او سرپرست د دفاعي ځواکونو په چوکاټ کې د ښځو له پراخې ونډې اخیستنې څخه قدرانی وکړ او زیاته يې کړه:« د ملي دفاع وزارت ښځینه منسوبینو ته د امکاناتو او اسانتیاوو په برابرولو سره په دې وزارت کې د ښځو له پاره مثبت بدلون را منځته کړی دی.
د ملي دفاع وزارت لومړي مرستیال او سرپرست زیاته کړه: "نن ورځ ، په ملي دفاع وزارت کې ښځینه منسوبینې د مشرتابه تر کچې پورې په مهمو دندو ګمارل شوي دي."
له بلې خوا، د کورنیو چارو وزیر محمد مسعود "اندرابي" د دفاعي او امنیتي ملي ځواکونو ښځینه منسوبینو لپاره د کار خوندي چاپیریال رامنځته کولو لپاره د نړیوالو بنسټونو له همکاریو مننه وکړه او وویل: د ښځو لپاره د ښې کاري فضآ د رامنځته کېدو او همداراز د دفاعي او امنیتي ملي ځواکونو د ښځینه شهیدانو د کورنیو لاس نیوي په برخه کې لازم ګامونه اخیستل شوي دي.
همداراز د مارچ د اتمې په ویاړ د ملي دفاع وزارت د ښځینه منسوبینو لپاره ورزشي تالار چې د وزارت په قرارګاه کې په معیاري توګه جوړ شوی دی، د هېواد د لومړۍ مېرمنې او د وزارت د مشرتابه په شتون کې پرانیستل شو.
