هلمند ولایت ته د ملي دفاع وزارت د سرپرست سفر
د ملي دفاع وزارت سرپرست اسدالله خالد، د کورنیو چارو له سرپرست وزیر محمد مسعود اندرابي او په افغانستان کې د ناټو له عمومي قوماندان جنرال اسکاټ میلر سره، د ټاکنو په ورځ د امنیتي تدابیرو او د عمومي وضعیت د څېړنې په موخه نن هلمند ولایت ته سفر وکړ.
د ملي دفاع او کورنیو چارو سرپرست وزیران او د ناټو عمومي قوماندان، په دې سفر کې ددغه ولایت له والي او سلاکارو امنیتي چارواکو سره ولیدل او په هلمند کې د ټاکنو په ورځ د امنيتي تدابیرو او د وضعیت د ښه والي په موخه لازم هدایات صادر کړل.
همداراز د ملي دفاع وزارت سرپرست ددغه سفر په ترڅ کې، په ولسي جرګه کې د هلمند د باعزته خلکو له استازي محترم غلام ولي افغان څخه چې تیره ورځ په یوې چاودنې کې ټپي شو، عیادت وکړ.
