د هېواد د وسله والو ځواکونو لوى درستيز بدخشان ولايت نسي او خواهان ولسواليو له سرحدي سیمو څخه ليدنه وکړه
د هېواد د وسله وال پوځ لوی درستیز قاري محمد فصیح الدین " فطرت " د هېواد په شمالي ولایتونو کې د ملي اسلامي اردو له قطعاتو او جزوتامونو څخه د لیدنې په ترڅ کې د بدخشان ولایت نسي او خواهان په ولسوالیو کې د درېیمې او څلورمې سرحدي پوستو څخه لیدنه وکړه.
د وسله وال پوځ لوی درستیز د سرحدي ځواکونو د کارونو او فعالیتونو له ارزونې وروسته د سرحدي ځواکونو له قوماندانانو، د کنډکونو له مسوولینو، ولسوالانو او امنیه قوماندانانو سره د یوې ناستې په ترڅ کې د هغوی وړاندیزونه او نظریات واورېدل او په دې اړه یې نظرونه تبادله کړل؛ او همداراز د بېلابېلو ستونزو د هواري په موخه يې ژمنه ورسره وکړه چې د يادو ستونزو په اړه به مرکز کې له مشرانو او مسوولينو سره خبرې وکړي.
لوی درستیز د دغه سفر په ترڅ کې د بدخشان ولایت د نسي ولسوالۍ له سلمان فارس مدرسې څخه هم لیدنه وکړه او د دغې ولسوالۍ له خلکو سره یې وکتل.
