د ملي دفاع وزارت سرپرست وزیر له ۲۱۷ عمري قول اردو څخه لیدنه وڪړه
د ملي دفاع وزارت سرپرست وزیر مولوي محمد یعقوب "مجاهد" د هيواد شمال زون ته د خپل سفر په ترڅ کې کندز ولایت ته ولاړ او هلته یې د ۲۱۷ عمري قول اردو له رهبرۍ، مسؤلینو او همدارنګه د يادې قول اردو اړوند اومې سرحدي لواء له مجاهدینو سره ولیدل.
مولوي محمد یعقوب "مجاهد" د ۲۱۷ عمري قول اردو مجاهدینو ته هر اړخیزه وینا وکړه او زیاته یې کړه: «چې د صف وحدت، د خپلو امیرانو اطاعت، د اسلامي نظام د استحکام او د خپلو اسلامي او ملي منافعو ساتنې ته ځانګړې پاملرنه وکړئ».
مولوي محمد یعقوب “مجاهد” د قول اردو رهبري او مسؤلینو ته په خبرو کې وویل: چې د خپل افغان ملت د هوساینې لپاره په خپل ټول توان کار وکړئ او د یادې قول اردو مسؤلینو سره یې ژمنه یې وکړه چې هڅه کوو په ټول توان سره خپل قطعات او جزوتامونه په پوره توګه اکمال کړو.
همداراز سرپرست وزیر مولوي محمد یعقوب “مجاهد” ياد سفر کې د شېر خان بندر څخه د کتنې ترڅنګ د کندوز ولايت أصحاب الصفه دارالأيتام ښوونکو او زده کونکو سره هم وليدل.
