د ملي دفاع سرپرست وزیر د ځانګړو ځواکونو د لومړۍ دورې په فراغت غونډه کې ګډون وکړ
يوه ورځ مخکې د ملي دفاع وزارت اړوند ځانګړو ځواکونو قوماندانۍ له لومړۍ دورې څخه ۴۸۵ تنه مجاهدین له درې میاشتني عقیدوي، نظامي او مسلکي زده کړو څخه وروسته د یولړ شانداره مراسمو په ترڅ کې فارغ شول.
دغه مراسمو کې د ملي دفاع وزارت سرپرست وزیر مولوي محمد یعقوب "مجاهد" حفظه الله او د یاد وزارت ګڼ شمیر مسؤلینو او مجاهدینو ګډون وکړ.
مولوي محمد یعقوب "مجاهد" حفظه الله پخپله وینا کې وویل: ستاسو دغه ستړیاوې او تکلیفونه د یو لوی مقصد لپاره دی هغه دا چې د ګران هیواد په پاکه خاوره شرعي نظام نافذ کړو او داسلامي نظام په وړاندې چې هرڅوک بغاوت کوي تاسو به یې مقابله کوئ، او ولس ته وایم چې دغه ځانګړي ځواکونه ستاسو د سر، مال او عزت ساتنه کوي او موږ هېچاته اجازه نه ورکوو چې ستاسو خوشحالي درڅخه واخلي ترڅو چې ژوندي یو د ولس ساتنه به کوو.
همدا راز د ځانګړو ځواکونو مرستیال قوماندان مولوي مختار احمد "عمري" له مسؤلینو څخه مننه وکړه او ډاډ یې ورکړ چې په راتلونکي کې به تردې هم پیاوړی او قوي ځواک د اسلامي نظام او د هیواد د ملي حاکمیت د ساتنې لپاره وروزو.
