د برید جنرال عبدالودود نجرابي د جنازې مراسم د سردار محمد داوود خان په روغتون کې ترسره شول
د برید جنرال عبدالودود نجرابي د جنازې مراسم د ملي امنیت شورا د سلاکار حمدالله محب، د ملي دفاع وزارت د لومړي مرستیال شاه محمود میاخیل، د ملي دفاع وزارت د جنرالانو او افسرانو په ګډون سره ترسره شو او د شهید جنرال نجرابي له مبارزو او سرښیندنو یې په نیکۍ سره یادونه وکړه.
د ملي امنیت شورا سلاکار د جنرال نجرابي له اتلولیو ستاینه وکړه او وې ویل: د حکومت مشرتابه او د افغانستان خلک به هیڅکله د هېواد او خلکو څخه د دفاع په لار کې ددغه جنرال سرښیندنې هېرې نکړي.
جنرال نجرابي پرون د کندز ولایت د خان آباد ولسوالۍ د چهار توت په سیمه کې واټ ته څېرمه د یوه ماین د چاودنې په پایله کې په شهادت ورسید.
د ملي دفاع وزارت مشرتابه د برید جنرال عبدالودود نجرابي د شهادت په تړاو د غمشریکۍ او خواخوږۍ مراتب د نوموړي محترمې کورنۍ، د ملي اردو منسوبینو او د افغانستان خلکو ته څرګندوي او د خدای ج له درباره شهید نجرابي ته جنت الفردوس او کورنۍ ته یې د جمیل صبر هیله کوي.
