دطالب ترهګرو له بند څخه د دفاعي او امنیتي ځواکونو له آزادو شویو بندیانو سره د مسلح ځواکونو د لوی درستیز ملاقات

د مسلح ځواکونو لوی درستیز ښاغلي ستر جنرال بسم الله وزیري دوشنبې ورځ وروسته له غرمې څخه د افغان ځواکونو له یو شمېر هغو منسوبینو سره وکتل, چې په دې وروستیو کې د افغان ځواکونو دهڅو په پایله کې د بادغیس ولایت په بالا مرغاب ولسوالۍ کې د طالبانو له بند څخه آزاد شوي و.
لوی درستیز له آزادو شویو زندانیانو سره د لیدنې پر مهال ژمنه وکړه, چې د دوی غوښتنې او وړاندیزونه به ژر تر ژره پوره کوي.
وروسته د طالبانو له زندان څخه د آزادو شویو بندیانو په استازیتوب ۲ تنو خبرې وکړې او دخبرو پر مهال یې د افغان اتلو ځواکونو هغه هڅې, چې د طالبانو له بند څخه يې د دوی د خوشي کولو په برخه کې تر سره کړې وې د ستایلو وړ وبللې او په دې تړاو يې د ملي دفاع وزارت له مشرتابه پلاوي څخه د زړه له کومي مننه وکړه.