د ۳۱۳ مرکزي قول اردو څخه ۴۵۰ سرتیري فارغ شول
د اسلامي امارت د ملي اردو ۴۵۰ تنه سرتیري له پرمختللو نظامي، بنسټیزو، مسلکي او عقیدتي زده کړو وروسته له ۳۱۳ مرکزي اردو څخه فارغ شول.
د دغو سرتیرو د فراغت مراسم د درستیزوال شیخ الحدیث مولوي نقیب الله «عزیزي»، د ۳۱۳ مرکزي قول اردو مرستیال مولوي نصرت، د نظامي امر باالمعروف رییس مولوي راز محمد او یو شمېر حکومتي مسولینو په شتون کې د کابل ۳۱۳ مرکزي قول اردو کې ترسره شول.
درستیزوال نقیب الله "عزیزي" وویل: د شکر او ویاړ ځای دی، چې نن د اسلامي امارت روزل شوې او مسلکي اردو د سختو تمریناتو په تیریدو سره یو ځل بیا د خلکو او خاورې د لا ښه خدمت له پاره چمتو کیږي.
همدا راز د نظامي امر باالمعروف رییس مولوي رازمحمد، د اسلامي اردو د مسوولیتونو په تړاو په خپلو خبرو کېې وویل: "هغه سرتېری چې خپلو اسلامي او ملي ارزښتونو ته غاړه نه ږدي، په اسلامي اردو کې به يې ځای نه وي."
دغو فارغو شويو سرتېرو د تکتيکي او پوځي وړتیاوو په ښودلو سره ډاډ ورکړ، چې د ځمکنۍ بشپړتيا، خپلو خلکو د ژوند او مال څخه به په کلکه دفاع او ساتنه کوي.
