بلخ ولايت ته د ملي دفاع وزارت مشرتابه سفر
د ملي دفاع وزارت سرپرست مولوي محمد یعقوب "مجاهد" او د وسله وال پوځ لوى درستيز قاري فصیح الدین "فطرت" د ولایتي سفرونو په دوام بلخ ولایت ته ولاړل او هلته يې د ٢٠٩ الفتح قول اردو له مشرتابه او منسوبینو سره وکتل.
په همدې موخه په جوړو شویو مراسمو کې د ملي دفاع وزارت سرپرست د اسلامي امارت د مجاهدینو د نه ستړي کېدونکو هلو ځلو او سرښندنو د ستاينې ترڅنګ وویل:" ستاسو د قهرمانانو د مبارزې ثمره ده، چې له دوه لسیزو اشغال وروسته مو هېواد د یرغلګرو له منګولو پاک کړ."
همدا راز د وسله وال پوځ لوى درستيز قاري فصیح الدین فطرت وویل: "تاسو د افغانستان زړورو مجاهدینو د نړۍ زبرځواکونو ته په الهي نصرت سره ماتې ورکړه، د جګړې په ډګر کې مو بریا ترلاسه کړه، د خپلې خاورې او وطن حاکمان شوٸ."
