د رسنیو له ارشدو مسوولانو سره د ملي دفاع وزارت د مشرتابه لیدنه او خبرې اترې
د ملي دفاع وزارت وزارت د لومړي مرستیال شاه محمود "میاخیل"، د پرسونل او ښوونې په چارو کې د ملي دفاع وزارت مرستیالې منیره "یوسف زاده"، د ټکنالوژۍ او لوژستیک د تامیناتو په برخه کې د ملي دفاع وزارت د مرستیال عبدالله "رقیبي"، د ملي دفاع وزارت ویندویانو او رییسانو، د حکومت د رسنیو د مرکز رییس او د کورنیو او بهرنیو رسنیو د ارشدو مسوولانو په ګډون ددغه وزارت په مقر کې غونډه جوړه شوه.
په دې غونډه کې د ملي دفاع وزارت لومړي مرستیال وویل: مونږ د بیان آزادۍ او معلوماتو ته د خلکو او ادارو لاسرسي ته ژمن یو او دا د خلکو مسلم حق ګڼو.
د ملي دفاع وزارت، رسنیو ته د معلوماتو د وړاندې کېدو په برخه کې ژمن دی او دفاعي او امنیتي ملي ځواکونو ددغه څير ارزښتونو د ساتنې لپاره په تېرو دوه لسیزو کې زیاتې سر ښيندنې کړې دي او رسنۍ هم ددغې موضوع په درک سره تل د ملي دفاع وزارت د لاسته راوړنو او فعالیتونو د انعکاس په برخه کې فعاله ونډه ترسره کړې ده.
د ملي دفاع وزارت لومړي مرستیال زیاته کړه چې معلوماتو ته د خلکو او رسنیو لاسرسی کولای شي ادارې د خپلو دندو او مسوولیتونو په برخه کې ځواب ویونکي کړي.
همداراز د ملي دفاع وزارت مشرتابه د امنیتي مسایلو او د ملي اردو د لاسته راوړنو په تړاو ددغو رسنیو د مسوولانو پوښتنو ته ځوابونه ورکړل.
