په ننګرهار کې د سيمه ييزې اردو ۱۵۳ تنه سرتیری فارغ شول
د ۲۰۱ سيلاب قول اردو په ښوونیز مرکز کې د ننګرهار ولایت د کوټ، هسکې مېنې او ګوشتې ولسواليو لپاره، ۱۵۳ تنه سرتیري چې له سیمه ییزو پولیسو څخه په سيمه ييزې اردو کې جذب شوي وو، د یو لړ مسلکي زده کړو وروسته فارغ او د امنیت ټېنګښت په موخه خپلو سیمو ته واستول شول.
د غونډې ګډونوالو دغو فارغینو ته وویل: ستاسو دا منظم صفونه، د جګړې په ډګر کې سر ښندونکې مبارزه او له پوځي زدګړو ګټنه، د هېواد د سولې او ټیکاوو د دښمنانو په ځان لړزه رامنځته کوي.
دغو تازه فارغ شویو ځواکونو ډاډ ورکړ چې په هېواد کې به د تل پاتې سولې او ارامتیا د ټېنګښت په موخه په ټول ځواک سره هڅه وکړي او هېچاته به اجازه ورنکړي چې هېوادوالو ته زیان ورسوي.
