په افغانستان کې د یوناما د بشري حقونو له رییس سره د ملي دفاع وزارت لومړي مرستیال او سرپرست لیدنه
ملي دفاع وزارت لومړي مرستیال او سرپرست شاه محمود"میاخیل " په افغانستان کې د یوناما د بشري حقونو له رییسې میرمن "فیوڼا فرازر" سره نن د خپل کار په دفتر کې ولیدل.
ملي دفاع وزارت او یوناما دواړو لوریو په وسله واله جګړه کې د ملکي وګړو ساتنې په تړاو بحث او خبرې وکړې.
د ملي دفاع وزارت لومړي مرستیال او سرپرست د یوناما هغه راپور یاد کړل، چې د ملکي تلفاتو اصلي لامل طالبان دي.
نوموړي وویل: دفاعي او امنیتي ځواکونه د قربانیو په ورکولو سره ترهګرو د بریدونو پر وړاندې د ملکي خلکو څخه دفاع او ساتنه کوي، ملي اردو د جګړې په ډګر کې د بشر حقونو د تګلارې او اصولو تطبیق ته ژمن دي، د ملي دفاع وزارت ټولو قطعاتو ته د ملکي تلفاتو د مخنیوي په تړاو لازم هدایت ورکړي دي.
همداراز د یوناما د بشري حقونو رییس د ملکي وګړو د ساتنې په برخه کې له هر اړخیزو مرستو او همکاریو ټيڼګار او ژمنه وکړه.
ښاغلي میاخیل د دفاعي او امنیتي ځواکونو او د افغانستان له خلکو سره د یوناما د مرستې او همکارۍ له امله قدرداني وکړه.
