د ٢٠٩ الفتح قول اردو څخه ٣٠٠ سرحدي سرتيري فارغ شول
تيره ورځ د سمنګان ولایت اړوند د سرحدي لوا څخه ۳۰۰ تنه سرتېري د بنسټيزو، مسلکي او پوځي زده کړو وروسته د يو لړ مراسمو په ترڅ کې، چې د ۲۰۹ الفتح قول اردو قوماندان مولوي عطاء الله "عمري"، علماوو او نورو ملکي او نظامي چارواکو په کې ګډون کړی وو، فارغ شول.
د الفتح قول اردو قوماندان د فراغت په دغه مراسمو کې د اسلامي امارت ځواکونو څخه د هېواد د خپلواکۍ او د اسلامي ارزښتونو د ساتنې په لاره کې د دوې ميړانې او سرښندنې وستایلې او يادو سرتيرو ته يې وويل: له دې وروسته دغه مسوليت چې تاسو ته سپارل شوى، د امانتدارۍ او خلکو ته د خدمت په کولو کې له هیڅ ډول هڅو څخه ډډه ونه کړٸ."
دغه روزل شوي او مسلکي سرتېري به د سمنګان ولایت په بېلابېلو برخو کې د ښه امنيت د ټينګښت په موخه وګمارل شي. په داسې حال کې چې تیره ورځ د سرپل ولایت څخه هم ۲۰۰ تنه سرتیري د مسلکي او پوځي زده کړو له بشپړولو وروسته فارغ شول.
