د وسلوال پوځ لوی درستیز مرستیال خوست ولایت کې د وروستۍ پیښې د شهیدانو او ټپیانو له کورنیو سره د ډاډګیرنې او خواخوږۍ په موخه ولېدل

د ملي دفاع وزارت د لوى درستيز لومړي مرستيال حاجي مالي خان د سيمه ييزو نظامي او ملکي مسوولينو په ملتيا تیره ورځ د خوست ولايت د سپېرې ولسوالۍ کې د وروستۍ پېښې سیمې ته ولاړ او د پاکستان د هوايي برېدونو د شهيدانو او ټپيانو له کورنيو سره په دغو سرحدي سیمو کې وکتل او د خواخوږۍ او ډاډ ګیرنې مراتب یې وړاندې کړل.

د هېواد د ځمکنۍ بشپړتیا او ساتنې په اړه د اسلامي امارت مجاهدینو د وړتیاوو په تړاو د لوی درستیز مرستیال وویل:"څرنګه چې د افغانستان له خاورې څخه هيڅ کوم بل هېواد ته ګواښ نشته، موږ له ګاونډیو هېوادونو غواړو چې د افغانستان خپلواکۍ ته هم درناوی ولري."

همدا راز د ملي دفاع وزارت لوى درستيز د پېښې د ټپيانو پر وخت د درملنې په موخه مسوولينو ته لازمې لارښوونې وکړې او د پېښې د شهيدانو او ټپيانو له کورنيو سره يې د خوراکي توکو او نغدي پيسو مرسته وکړه.