د وسلوال پوځ لوی درستیز له خوا د ملي دفاع وزارت د انجینرۍ رییس او قوماندان معرفي شول
د ملي دفاع وزارت په وړاندیز او د افغانستان اسلامي جمهوريت او د وسلوال پوځ د اعلی سر قوماندان د عالي مقام د حکم پر بنسټ, د ستر درستیز د انجنیرۍ رییس برید جنرال "مرزا محمد" او ډګروال روز محمد "غرني" د انجنیرۍ لوا د قوماندان په توګه د وسلوال پوځ لوی درستیز ډګر جنرال ولي محمد "احمدزي" له خوا, معرفي شول.
په دې مراسمو کې د وسلوال پوځ لوی درستیز د انجنیرۍ منسوبینو د کړنو څخه د مننې تر څنګ وویل: "د انجنیرۍ صنفونه د اردو یو له بنسټیزو صنفونو څخه دي, چې محاربوي دندو په دوام مهمې او موثرې وظیفې په غاړه لري."
د انجنیرۍ نوي رییس برید جنرال مرزا محمد ډاډ ورکړ, چې د ملي دفاع وزارت او ستر درستیز اوامر او دندې به په پوره ژمنتیا او ریښتینولۍ سره په هر وخت کې د خپلو خلکو چوپړ له پاره تر سره کوم.
همدا راز د پوځ لوی درستیز د انجنیرۍ لوا منسوبین او مسولانو ته د لا زیاتو هڅو او په ورسپارل شوو دندو او مسؤلیتونو کې په لا ښه تر سره کیدو باندې ټينګار وکړ.
