د ملي دفاع وزارت ۲۰ تنه منسوبین د تفتیش له یوې ښوونیزې تخصصي دورې څخه فارغ شول
د ملي اردو ۲۰ تنه منسوبینو د تفتیش له ۲ میاشتو مسلکي تخصصي ښوونو وروسته، نن د ملي دفاع وزارت دلومړي مرستیال ډاکټر نجیب الله "وردګ"، جنرالانو او افسرانو په شتون کې د ځانګړو مراسمو په ترڅ کې فارغ شول.
په دې مراسمو کې د ملي دفاع وزارت لومړي مرستیال د ملي اردو منسوبینو مسلکي کیدل مهم وبلل او زیاته یې کړه: « فساد سره د مبارزې پر وړاندې ددغه څېر تخصصي کورسونو جوړول، مثبت ګام دی.»
د ملي دفاع وزارت لومړي مرستیال ټینګار وکړ، چې په ادارو کې د کارکوونکو له لوري جدي ژمنتیا ددې لامل کېږي څو د فساد پر وړاندې کلکه مبارزه وشي.
همدا راز د ملي دفاع وزارت سرمفتش ډاکټر عبدالناصر «اصفیا» وویل:«دا فارغان به د ملي اردو په قطعاتو او جزوتامونو کې د منسوبینو د حقوقو د تآمین په برخه کې اغیزمن ګامونه اوچت کړي.»
یادو فارغانو لوړه وکړه چې له فساد سره د مبارزې په دګر کې به په کلکه کار وکړي.
