د ملي دفاع وزارت سرپرست وزیر د افغانستان لپاره د اروپایې ټولنې د ځانګړې استازولۍ له سرپرست سره وکتل
د ملي دفاع وزارت سرپرست وزیر ستر جنرال بسم الله "محمدي" نن د افغانستان لپاره د اروپایې ټولنې د ځانکړې استازولۍ له سرپرست " تامس نیکلاسن" سره په ملي دفاع وزارت کې وکتل.
د افغانستان لپاره د اروپایي ټولنې د ځانګړې استازولۍ سرپرست د سولې او ثبات د دښمنانو لخوا د تاوتریخوالي د زیاتیدو په اړه د اندیښنې په څرګندولو سره زیاته کړه، په افغانستان کې د تل پاتې سولې لاسته راوړلو له پاره د سولې خبرې یو ښه فرصت وباله.
همدا راز د افغانستان لپاره د اروپایې ټولنې د ځانګړې استازولۍ سرپرست د افغانستان له خلکو سره په بیلابیلو برخو کې ددغې ټولنې د مرستو پر دوام ټينګار وکړ.
د ملي دفاع وزارت سرپرست وزیر د افغانستان له حکومت او خلکو سره د اروپایې ټولنې له مرستو او همکاریو قدردانی او مننه وکړه, او زیاته کړه چې په هېواد کې د سولې او ثبات ټینګښت د دفاعي او امنیتي ځواکونو له لومړیتوبونو څخه دی.
