د ا.ا.ا ملي دفاع وزارت اړوند د ځانګړو کمانډویي ځواکونو د شپږمې دورې ابتدایي تعلیماتو څخه د سلګونه تنه ځانګړو کمانډویي ځواکونو په فراغت غونډه کې د ریاست الوزراء اقتصادي مرستیال الحاج ملا عبدالغني "برادر" د کابینې یو شمېر وزیرانو او د یاد وزارت ګڼ شمېر مسؤلینو او مجاهدینو ګډون وکړ.

د ریاست الوزراء اقتصادي مرستیال الحاج ملا عبدالغني "برادر" پخپلو خبرو کې وویل: ډیر خوشحاله یم چې نن د اسلام او هیواد ساتونکو په غونډه کې شتون لرم، نن چې یو خپلواک اسلامي نظام حاکم دی دا د شهیدانو د قربانیو پایله ده او د سرحدونو ساتل، د شریرو عناصرو په وړاندې درېدل او د خاورې ساتنه ستاسو مقدسه او اساسي دنده ده او همدارنګه د هیواد په دښمنانو غږ کوم چې زموږ خاورې او حریم ته دې په بد نظر نه ګوري نور دې زموږ د افغانانو حوصلې نه ازمایي هېچاته اجازه نه ورکوو چې زموږ په خاوره تیری وکړي او هر ډول تېري ته ځواب ویونکي یو، موږ د حدودو په چوکاټ کې هر هیواد سره متقابلو اړیکو ته ژمن یو.

همدا راز دغو ځانګړو کمانډویي ځواکونو د هلیکوپترو پرمټ خپل هوایي مانورونه او ځمکني پوځي تکتیکات د لوژ له مخې په عالي نظم او لوړ مرال سره د مشرانو په وړاندې ترسره کړل.

دغه بېلابېل ځانګړي کمانډویي قطعات په بشپړ عقیدوي، فکري او پوځي روزنې سمبال د هیواد له ځمکنۍ بشپړتیا او سرحداتو څخه د دفاع په موخه هر ډول سرښندنو ته چمتو شول او هر یرغلګر چې زموږ هیواد ته بده اراده وکړي د یادو ځواکونو له کلک غبرګون سره به مخ شي.

یاد مراسم فارغ شویو کمانډویي ځواکونو ته د ستاینلیکونو په ورکولو او دُعایه کلام سره پای ته ورسېدل.

ورته مهال د حضرت عبدالله بن مسعود رضی الله‌ عنه د جګړه‌ايزو ګډو زده‌ کړو قوماندانۍ د جګړه ایزو ځواکونو له ښوونځۍ څخه ١١٤ تنه ځوان منسوبین د هاوان SPG-9 ،د اراضي کشف ،M2 ماشیندار، M24-Sniper او توپچي تورنانو د څلور میاشتنیو نظري او عملي زده‌ کړو څخه هم فارغ شول.