د حضرت عبدالله ابن مسعود رضی الله عنه د جګړه ایزو ګډو زده کړو قوماندانۍ څخه ۱۵۵ تنه منسوبین فارغ شول
د ملي دفاع وزارت د سیمه ایزو قول اردوګانو او قطعاتو ۱۵۵ تنه منسوبین د حضرت عبدالله ابن مسعود رضي الله عنه د جګړه ایزو ګډو زده کړو قوماندانۍ د مخابرې، لوژستیک، حفظ او مراقبت،املاک او اکمالاتو له درې میاشتنیو مسلکي زده کړو څخه نن د یو لړ مراسمو په ترڅ کې فارغ شول.
په دې مراسمو کې د ملي دفاع وزرات د پرسونل او تعلیماتو معاونیت مرستیال مولوي باز محمد "حمیدي" او ګن شمېر مجاهدینو، مسؤلینو او منسوبینو ګډون کړی وو.
د تعلیماتو او پرسونل معاونیت مرستیال مولوي باز محمد "حمیدي" د وینا پر مهال وویل: «مجاهدین قوم پرست او سمت پرست نه بلکې خدای پرست دي د همدې ټکې په پام کې نیولو سره باید خپل نفس د اسلام تابع وګرځوي، درسپارل شوي مسؤلیتونه باید په ښه توګه سرته ورسوئ، همدارنګه ترلاسه کړې مسلکي زده کړې د الله ج د رضا او اسلامي نظام ته د خدمت په موخه خپلو قطعاتو او جزوتامونو کې نورو مجاهدینو ته هم ور زده کړئ.
د یادولو وړ ده چې د ۱۵۵ تنو مجاهدینو په ډله کې ۴۰ تنه د پنجشیر ولایت هغه ځوانان هم شامل دي چې د ملي اسلامي اردو لیکو ته نوي جذب او د عسکرانو بنسټيزو زده کړو ښوونځي کې یې لومړنۍ درې میاشتنۍ پوځي زده کړې ترلاسه کړې؛ ياده غونډه فارغانو ته د برۍ لیکونو په ورکولو سره پای ته ورسېده.