د ملي دفاع وزارت سرپرست ستر جنرال اسدالله خالد لغمان ولایت ته سفر وکړ

د ملي دفاع وزارت سرپرست سترجنرال اسدالله خالد د امنیتي وضعیت ارزولو او دشهید «عبدالحلیم لغماني» هغه سرتېری چې څو ورځې وړاندې تورخم کې له پاکستاني پوځیانو سره جګړه کې شهید شو؛ کورنۍ سره د غمرازۍ په موخه نن لغمان ولایت ته ولاړ.

د ملي دفاع وزارت سرپرست خلکو ته د وینا پر مهال وویل:"ملي، دفاعي او امنیتي ځواکونو به په هرقېمت له افغانستانه ساتنه وکړي او د افغانستان هېڅ کومه سیمه به سقوط ونکړي."

سترجنرال اسدالله خالد ټینګار وکړ چې امنیتي ځواکونو د سولې بهیر ته د درناوي په موخه جګړه ورو کړې او اوسمهال په دفاعي حالت کې دي.

همداراز د لغمان والي رحمت الله یارمل د امنیت ټېنګښت په برخه کې د ستر جنرال اسدالله خالد هڅې وستایلې.

سترجنرال اسدالله خالد له پاکستاني پوځیانو سره نښته کې د شهید شوي افغان پوځي «عبدالحلیم لغماني» کورنۍ سره په سپرۍ سیمه کې له نږدې لیده کاته او خواخوږي وکړه.

د ملی دفاع وزارت سرپرست د پاکستاني پوځیانو پر وړاندې د عبدالحلیم د اتلولۍ ستاینه وکړه.