د ناټو ملکي استازي د ملي دفاع وزارت سرپرست سره په لیدنه کې افغانستان سره د دې سازمان د مرستو او همکاریو په دوام ټینګار وکړ
د ملي دفاع وزارت سرپرست وزیر ستر جنرال بسم الله "محمدي" په افغانستان کې د ناټو له ملکي استازي "سټیفانو پونتیکورو" سره, نن د خپل کار په دفتر کې کتنه وکړه.
لومړی، د ملي دفاع سرپرست وزیر د هېواد دفاعي او امنیتي ځواکونو د پیاوړي کولو لپاره د ناټو له همکاریو څخه مننه وکړه او د افغان ځواکونو د وړتیا اوظرفیت لوړولو کې د دغو مرستو رول مهم او موثر وباله.
د ملي دفاع وزارت سرپرست وویل: "د نړیوالې ټولنې په ځانګړي توګه د ناټو ملاتړ د دې ځواکونو د جنګي او مسلکي وړتیاوو په زیاتوالي کې اغیزناک رول لري."
همدا راز د ملي دفاع وزارت سرپرست زیاته کړه, چې د افغانستان دفاعي او امنیتي ځواکونه په خپلواکه توګه د هېواد دفاع ته چمتو دي او هڅه کوي چې د هېوادوالو له مال او ځان څخه ساتنه وکړي او طالبانو ته به اجازه ور نه کړي چې د وینې تویولو او جګړې له لارې خپل نا مشروع رژیم په خلکو وتپي.
د ملي دفاع وزارت سرپرست په وینا، په افغانستان کې د بحران یوازینۍ حل لاره د سولې خبرې دي او طالبان باید دې خبرو ته غاړه کیږدي.
په افغانستان کې د ناټو ملکي سفیر سټیفانو پونټیکورو په هېواد کې د سولې او ثبات راوستو لپاره د افغانستان دفاعي او امنیتي ځواکونو د هڅو ستاینه وکړه او زیاته یې کړه, چې د افغان ځواکونو هڅو د افغانستان ولس او نړیواله ټولنه هیله منده کړي چې دوی په خپلواکه توګه د خپلو خلکو او هېواد څخه دفاع کولای شي.
په افغانستان کې د ناټو ملکي استازي څرګنده کړه چې ناټو به له افغانستان سره په ځانګړي توګه د هېواد دفاعي او امنیتي ځواکونو سره د ناټو قواوو له بشپړ وتلو وروسته هم خپلو مرستو ته دوام ورکړي، او ټینګار یې وکړ چې ناټو به سږ میلادي کال له ۳۲۰ میلیونه ډالرو ډېرې مرستې د افغانستان دفاعي او امنیتي ځواکونو د ظرفیت لوړولو په خاطر په مصرف ورسوي.
