د حضرت عبدالله بن مسعود رضی الله عنه د جګړه ایزو ګډو زده کړو قوماندانۍ څخه ۱۰۴ تنه ځوان منسوبين فارغ شول
د ملي دفاع وزارت د بیلابیلو قطعاتو او جزوتامونو ۱۰۴ تنه ځوان منسوبين د تعلیماتو او پرسونل معاونیت اړوند د عبدالله بن مسعود رضی الله عنه د جګړه ایزو ګډو زده کړو قوماندانۍ د بیلابیلو ښوونځیو له ۳ میاشتنیو مسلکي او عقیدتي زده کړو څخه نن د یوې غونډې په ترڅ کې فارغ شول.
د عبدالله بن مسعود رضۍالله عنه د جګړه ایزو ګډو زده کړو قوماندانۍ د زده کړو مرستیال مفتي محمد اسلم "حقاني" فارغانو ته د اعداد د ترسره کولو د دنیوي او اخروي ګټو په هکله هر اړخیزه وینا وکړه او له یادو فارغانو څخه یې وغوښتل چې له ترلاسه کړو زده کړو څخه د اسلامي نظام د دفاع په موخه بشپړه ګټه پورته کړئ.
ورته مهال نویو فارغانو مسلکي زده کړې د اسلامي نظام د پیاوړتیا په موخه اړینې وبللې او ډاډ يې څرګند کړ چې د خپل سر په بدل کې به له اسلامي نظام څخه دفاع او ساتنه کوي.
غونډه فارغانو ته د بری لیکونو په ورکولو سره پای ته ورسېده.