د ملي دفاع وزارت سرپرست ښاغلی اسد الله خالد، نن د ملي دفاع وزارت او ستردرستیز پرسونل ته د یو لړ ځانګړو پوځي مراسمو په ترڅ کې ور وپېژندل شو

 

د ملي دفاع وزارت سرپرست ښاغلی اسد الله خالد، نن د ملي دفاع وزارت او ستردرستیز پرسونل ته د یو لړ ځانګړو پوځي مراسمو په ترڅ کې ور وپېژندل شو.

کابل- افغانستان: د ملي دفاع وزارت سرپرست ښاغلی اسد الله خالد په داسې حال کې، چې د ملي امنیت مشاور حمدالله محب، د سنا مجلس رئیس فضل الهادي مسلمیار، د کورنیو چارو وزارت سرپرست امرالله صالح، لوی درستیز سترجنرال محمد شریف یفتلي، د کورنیو چارو وزارت ارشد معیین، د غوڅ ملاتړ قومندان جنرال مېلر، د ملي امنیت مرستیالانو، د بشر د حقونو د خپلواک کمیسیون رئیس، په ولسي جرګه کې د خلکو استازو، د ملي دفاع پخوانیو وزیرانو، مرستیالانو، رئیسانو، د ملي دفاع وزارت او ستردرستیز د قرارګاه جنرالانو، د ملي پوځ د ساحوي قول اردوګانو قومندانانو، په کابل کې د بهرنیو هیوادونو سفیرانو، د دوست هیوادونو پوځي اتشه ؤ، د ولایتي شورا ګانو رئیسانو، د هیواد د بیلابیلو ولایتونو قومي مشرانو ګډون درلود، د ملي دفاع وزارت او ستردرستیز پرسونل ته په رسمي توګه معرفي شو.

په پیل کې د ملي پوځ لوی درستیز سترجنرال محمد شریف یفتلي ، د ملي دفاع وزارت د سرپرست په توګه د ښاغلي اسدالله خالد د ټاکلو د مبارکۍ ویلو ترڅنګ د ملي پوځ وروستۍ لاسته راوړنې په ګوته کړې او په دې برخه کې یې د هیواد د دښمنانو په له منځه وړلو ټینګار وکړ. همدا راز جنرال یفتلي ډاډ څرګند کړ، چې د ملي پوځ منسوبین د دې خاورې ریښتني ساتونکي دي او د هیواد د لوېشت لوېشت خاورې څخه د سر په قیمت دفاع کولو ته چمتو دي.

د ملي دفاع وزارت د سرپرست او ولسي جرګه ته د نوماند وزیر په توګه د ښاغلي اسدالله خالد د ټاکنې په اړه د افغانستان د جمهوری ریاست د لوړ مقام حکم د ملي پوځ د کادر او پرسونل د رئیس لخوا ولوستل شو.

 

ورپسې د ملي امنیت مشاور حمدالله محب د خبرو په ترڅ کې د هیواد نه د دفاع په لار کې، د امنیتي او دفاعي ځواکونو د منسوبینو د سرښندنو او قربانیو د یادولو تر څنګ د ملي دفاع وزارت د سرپرست په توګه د ښاغلي اسدالله خالد د ټاکلو مبارکې وویله.

 د ملي امنیت مشاور زیاته کړه، چې د افغانستان حکومت د هیواد د دښمنانو څخه مشخصه پیژندګلوي لري، هر هغه څوک، چې د نظام د تخریب په لټه کې دي، په حقیقت کې د نظام او د افغانستان د خلکو دښمنان دي. د افغانستان حکومت له هغه چا سره سوله کوي، چې د زړه له کومي سولې ته چمتو والی ولري. اما د هغه چا پر وړاندې چې د سولې پیغام نه مني د کلکې جګړې چمتو والی لري.

همدارنګه د ملي دفاع پخواني وزیر ډګرجنرال ارکانحرب طارق شاه بهرامي د ملي دفاع وزارت د سرپرست په توګه د ښاغلي خالد د ټاکلو د مبارکۍ ترڅنګ، د ملي پوځ په لیکو کې په اصلاحاتو او د پوځ په لا پراختیا ټینګار وکړ.

وروسته د ملي دفاع سرپرست وزیر ښاغلي اسدالله خالد مراسمو ته د کورنیو او بهرنیو ملمنو د راتګ په اړه ښه راغلاست وویل او د افغانستان د مسلح ځواکونو د اعلی سرقومندانۍ څخه یی د دې لپاره مننه وکړه، چې پر ښاغلي خالد یی د دغه لوی مسوولیت باور وکړ. همداراز ښاغلي خالد په پوځ کې د ملي یووالي په پیاوړي کولو او ساتنې ټینګار وکړ او د پوځ په لیکو کې يی د پرمختګ او اصلاحاتو خبر ورکړ. د دې ترڅنګ ښاغلي اسدالله خالد د  ملي پوځ په لیکو کې د همغږیتوب، د هغوی د مسلکي ښوونې او روزنې او د پوځ د معلولینو او د شهیدانو د ورثؤ سره په پوره ملاتړ تینګار وکړ. په پای کې د ملي دفاع سرپرست وزیر ښاغلي خالد د افغانستان د اسلامي دولت د مشرتابه پلاوي او د هیواد خلکو ته ډاډ ورکړ، چې ملي پوځ په ټول ځواک سره د سولې له پروسې څخه ملاتړ کوي، پر دښمن رحم نلري او ترڅنګ یی د ملکي وژنو څخه مخنیوي کوي، له جنګي اسیرانو سره ښه رویه د افغان پوځیانو شرعي او قانوني دنده ده.

###